Am Theatr Brycheiniog

Agorodd Theatr Brycheiniog, Canolfan Gelfyddydau Aberhonddu, ym mis Ebrill 1997, y sefydliad celfyddydau cyntaf i’w adeiladu o’r newydd a’i ariannu’n llwyr gan y Loteri yn y DU. Mae’n debygol fod y Ganolfan Gelfyddydau wedi’i lleoli yn un o’r lleoliadau harddaf i ganolfan o’r fath unrhyw le ym Mhrydain. Ar lan basn y gamlas ynghanol Aberhonddu, gan wasanaethu’r dref ac ardaloedd cyfagos Powys, Sir Fynwy a thu hwnt, mae wedi’i gwreiddio’n sownd yn y gymuned y mae’n darparu ar ei chyfer.

Ar hyn o bryd mae’r lleoliad yn darparu rhaglen amrywiol o theatr, dawns, cerddoriaeth ac adloniant yn yr awditoriwm pwrpasol 477-sedd, a’r gofod stiwdio / ymarfer 120-sedd. Mae yma hefyd ystafell gyfarfod, ystafelloedd gwisgo ac oriel, a phob un yn lle hyblyg sy’n cynnal amrywiaeth o ddigwyddiadau.

Nid yn unig y mae Theatr Brycheiniog yn gwasanaethu’r gymuned drwy gyfrwng rhaglen ragorol o gynyrchiadau proffesiynol Cymraeg a Saesneg o safon, ond dyma hefyd gartref Gŵyl Faróc Aberhonddu, sy’n denu cynulleidfaoedd ac ymwelwyr cenedlaethol a rhyngwladol. Mae’r theatr ar agor drwy’r flwyddyn, ac mae’n ymfalchïo yn ei gallu i ddenu ymwelwyr o bob cwr o’r wlad a’r byd.

Mae Oriel Andrew Lamont yn arddangos gwaith artistiaid lleol, cenedlaethol a rhyngwladol, a ddetholwyd yn arbennig gan banel celf weledol. Fyddwch chi byth yn gweld dwy arddangosfa debyg i’w gilydd, a bydd ffiniau celfyddydol yn cael eu gwthio’n aml!

Mae gan y theatr fwyty a bar, sef The Waterfront a Bar Glandŵr, y ddau’n gweini bwyd a diod o’r safon uchaf gan ddetholiad o gyflenwyr lleol.

Ariennir Theatr Brycheiniog gan Gyngor Celfyddydau Cymru, Cyngor Sir Powys a Chyngor Tref Aberhonddu.