Am Theatr Brycheiniog

Agorodd Theatr Brycheiniog, Canolfan Gelfyddydau Aberhonddu, ym mis Ebrill 1997; hwn oedd y sefydliad celfyddydau cyntaf i’w adeiladu o’r newydd gydag arian y Loteri yn unig ym Mhrydain. Lleolir Theatr Brycheiniog yn un o leoliadau mwyaf deniadol y DU, ar lan cei’r gamlas ynghanol Aberhonddu, ac mae’n falch o wasanaethu’r dref ac ardaloedd cyfagos Powys, Sir Fynwy a thu hwnt.

Mae Theatr Brycheiniog yn lleoliad celfyddydau amrywiol a phoblogaidd, sy’n cyflwyno cynyrchiadau proffesiynol bob blwyddyn sy’n cynnwys theatr, opera, dawns, ystod eang o gerddoriaeth, dangosiadau byw, digwyddiadau ffilm a phrosiectau cyfranogol, yn ogystal â bod yn lleoliad o bwys ar gyfer sefydliadau cymunedol lleol. Mae’r theatr ar agor drwy gydol y flwyddyn, gan ddenu ymwelwyr rheolaidd o bob cwr o’r wlad ac o dramor, yn enwedig ar gyfer digwyddiadau blynyddol allweddol, sy’n cynnwys Gŵyl Faróc Aberhonddu.

Mae’r lleoliad yn cynnig ystod o leoedd ar gyfer perfformio a chyfranogi, gan gynnwys yr awditoriwm 477 sedd pwrpasol ac ystafell ymarfer / stiwdio 120 sedd. Mae yma hefyd ystafell gyfarfod, ystafelloedd gwisgo ac oriel, law yn llaw â bar a chaffi ffyniannus, ac mae’r cyfan yn cynnig lle hyblyg sy’n cynnal amrywiaeth o ddigwyddiadau.

Ariennir Theatr Brycheiniog gan Gyngor Celfyddydau Cymru a Chyngor Tref Aberhonddu.